Maayo’g pagtagad sa mga langyaw ug mga kaila.
Apan Dong, pagmatngon; layo ra ba ka sa inyo.
Bisa’g brown pud ka’g nawng, di gihapon ka ingon namo.
Ingon si Lolo, sa una, muputol og ulo among tribo
Ingon si ‘Nang Isyang, sa una, makigstorya mi’g dili ingon nato.
Ingon si Lola, ang among mga ninuno, ani-a gihapon sa among kina-iya.
Nagkupot og hinagiban, kanunay’ng nag-atang.
Ang baba-on nga tindera nga si ‘Nang Isyang
nga mao’y makabantay ug makasaksi sa tanan
ang nagsilbeng umalahokan sa Barangay Bulahan
ug gwardiya namong tanan ang mga tambay sa iyang tindahan.
Nahinumdum ko’g usa ka garbosong ‘mirkano.
Buko-buko ra man unta to iyang gireklamo
Kay human kuno’g ligo, daw gibu-buan kuno’g asido
Pag-abot sa kanto, gikulata siya’g maayo.
Mao na, ‘Dong, pagmatngon, pagkinto.
Ay’g taka’g yawyaw, ay’g pabukala among dugo
Hipusa’g maayo kana imong garbo.
Kay Sus, nah, wa ra ba gyud ka sa inyo.
Back to English Poems
Back to Cebuano Poems
