”Dawata kini ug kan-a”
Matod pa niya --
sa iyang blog
nga nagsabwag
og pagdayeg sa iyang ego
(nga mas dako pa sa iyang talento)
Ug nangluwa og pagpanghinaway
ug si Inday
ningkuyog pud sa mga kalalakin-an
sa ilang pagdiskurso ug pagpamisti
aning tawng feeling-utokan.
Sayop, sayop, sayop.
Nganong ningpatol man ko’g
Buang?
Buang nga
sa iyang gidumala nga pwerteng gamayang kalibutan
siya LANG mao'y ehemplo sa kamaayo --
kanang "kamaayo"
nga kung dili tagdon
mangluod
ug mangita'g sayop sa la-ing taw
daw ginoo
nga nasayod sa tanang katuyuan
sa mga manghalaray og mugna
bisa’g di pa ka magsaba –
Ang tanan, nawng og kwarta, gawas niya.
Nasayod siya sa mga kalisod sa tanang musikero
Daw ginoong Hesu Kristo
nga iwag sa dalan mo,
Amen, Amen, Amen,
tig-ila og unsa'y nindot
tig-ila og unsa'y ma-ot
kay mura man gud ka'g wa'y utok
Maong siya na lang kuno'y
musakripisyo
apan una sa tanan
kinahanglan
Makahibaw ang kalibutan
sa iyang
mga kaantosan
una siya magpalansang
aron matarong tang tanan
(Pastilan
Wa man gud masayod si dodong
nga ang kalahian
tali sa iya
ug sa mga taw nga iyang gibombahan
mao ang kasayuran
nga kung muhalad ta'g minugna
alang sa kalibutan,
muhalad ta
nga nagduko.
Wa pud siya kaamgo
nga,
tinuod,
maglagot ta usahay
sa unsa’y di ma-ato.)
Pero lagi
Makapang "hahay" na lang ta ani
kay bisa'g unsa-on ko'g yawit nganhi
ang Buang
duna'y kaugalingong kalibutan
di marasonan
di matandog
kay siya man
mao'y
Ginoo
Kay matod pa’s Nestle
”Sa mata ng Buang, siya ang tama”
ug para niya
pildi ang tanang mupili
nga maghilom.
Mao'ng karon,
sa kahilom
Dawaton ta ning tanan og kan-on
kay mao kini ang lawas ug dugo
sa atong halangdong manluluwas
gikan sa kabati sa radyo ug komersyalismo
Mangluhod kita
kay mao iyang gusto
Mag-ampo kita
kay mao kuno'y sakto
Kita,
Mupadayon lang ta’g mugna
Ayaw’g tingog, ayaw’g saba
Kay oras nga kita makalupad nga wa siya’y labot
Mahimo tang maka-ingon
Ni-a ra
Dawata na.
Usapa.
Kan-a.
p.s
sayop pud iyang spelling sa "kunting pagtingin."
